బోధకుడివా నీవు.... బాధకుడివా!

భోదకుడివా నీవు..... బాధకుడివా!

కొండమీదకెక్కుతున్న క్రీస్తులా

నువ్వు స్టేజిమీదకెక్కుతుంటే

నా గుండె పొలంలో నాలుగు విత్తనాలు

నాటి వెళ్ళతావనుకున్నాను

వాచీ ఊడదీసి పక్కనపెట్టి

ఒకడికి పదిసార్లు

స్వరభేరిని నీవు సవరిస్తోంటే

రెండంచుల ఖడ్గధారివై

నా సంకెళ్ళు తెగ్గొడతావనుకున్నాను

అరగంటగా నువ్వు భావించే గంటన్నరలో 

ఆదికాండం నుంచి ఆఖరి గ్రంథందాకా

భూమ్యాకాశాలన చుట్టివచ్చావుగానీ

చిన్న వెలుతురు జాడను కూడా

వెంటబెట్టుకొని రాలేకపోయావు.

మూడు జోకులు ఆరు కొటేషన్లతో

అవలీలగా ప్రసంగాన్ని అల్లేస్తావుగానీ

ఎండిన ఎముకుల్లో నీరుపోసే వేడి నీకు లేదు 

పేరుకు వెనుక ముందూ వెనకా బారెడు డిగ్రీలను బడాయిగా 

మోస్తావుగానీ

దేవుడి మాటలు నాదాకా 

మోసుకురాలేవు

పవర్ పాయింట్లతో మా సహనాన్ని 

పరీక్షీస్తావే తప్ప నీ దగ్గర 

పవరూ లేదు పాయింటు లేదు 

చిత్రమైన ఒత్తుల భాషతో

చిత్ర వధ చేసే నీవు 

భోధకుడివా 'బాధ'కుడివా?

వారం వారం నీ బడిలో చదువుకుంటాను గానీ 

జీవితం పెట్టే ఏ పరీక్షా

పాసవ్వలేకపోతున్నాను.

మొకాళ్ళ పై శ్రమించి వాక్యలోతుల్ని శోధించి

సున్నితంగా నా ఆత్మను

స్పృశించే శక్తి నీవు పొందేదాకా

మహోన్నతుని ప్రతినిధిగా

మనుషుల ముందు నిలబడే

అర్హత నీకు లేదు  !